Новости муниципальных библиотек
Республики Мордовия

 

 

 

 

 

 

 

счетчик посещений

«Гайгезат свал тон, эрзянь кель!»: семинар

Раськесь эри, бути вансты эсензэ келензэ ды коензэ. Келесь вейсэнди ломантнень, сюлми ютазь шкатнень марто. Секс эрьва иестэ чадыковонь 16-це чистэ тешкстави Эрзянь келень чись. Тень кувалма чадыковонь 19-це чистэ Центральной районной библиотекасо ютавтозель семинар «Гайгезат свал тон, эрзянь кель!» велень библиотекатнень важодицятнень марто. Кортамось ветявсь тиринь келенть ванстовомадонть, весемень теемадонть, штобу эрзянь келесь гайгезэ школатнесэ, эйдень кужотнесэ, од ломантнень ютксо.
Семинаронть инжекс ульнесь Кулясбуень школань эрзянь келень да тиринь валонь тонавтыцясь Н. Г. Сигимова. Надежда Геннадьевна лецтизе, кода ушодовсь Эрзянь келень чинть тешкстамозо. Те покшчись ветяви 1994 иестэ саезь, А. П. Рябовонь чачома чистэ сядо иеть топодемастонть. Анатолий Павлович Рябов – кельсодый, эрзянь васенце профессор. Сон эсензэ аволь кувака эрямонзо перть сермадсь малав 30 важодемат эрзянь ды мокшонь кельтнень содамодост, «Эрзянь сокицянь букварь» ды ламо лия книгат – лездыцят тиринь келень тонавтнемасонть.
Теде мейле Надежда Геннадьевна ёвтнесь эрзянь сермадейденть Пётр Андреевич Ключагиндэ, конась чачсь-кассь Кулясбуе велесэ. Пётр Андреевич пек вечксы тиринь келензэ, ламо сермады эйсэнзэ аволь ансяк ёвтнемат, но и валморот, новеллат, лецтнемат кода покш ломанень, истя жо эйкакшонь туртов. Весе мельспаросо кунсолость ды ванность презентациянть, конась ульнесь невтезь П. А. Ключагинэнь эрямо кинзэ ды шкинеманзо кувалма.
Келесь – эрьва раськень сехте покш сюпавчизэ, конасонть сон корты, конасонть арси. Бути ванстови келесь, ванстовить раськенть койтне-кирдатне, ванстови культурась.



03 Мая 2017. Разместил: admin
Комментариев: 0

Имя:
E-mail: (при желании)

Смайлики:

smile wink wassat tongue laughing sad angry crying 

 
  [На главную] metod@library.saransk.ru